बेइजिङ ।  चीनले राज्यनियन्त्रित सम्पत्ति व्यवस्थापन कम्पनीका एक पूर्व कार्यकारीलाई भ्रष्टाचारको आरोपमा मङ्गलबार मृत्युदण्ड दिएको चिनियाँ सरकारी सञ्चारमाध्यमहरूले जनाएका छन्।

मृत्युदण्ड पाउनेमा चिनियाँ हुआरोङ इन्टरनेसनल होल्डिङ्स (सिएचएच) की पूर्व महाप्रबन्धक बाई तियानहुई छन्। उनलाई सन् २०१४ देखि सन् २०१८ को बीचमा परियोजनाहरूको अधिग्रहण र वित्तपोषणमा अनुकूल व्यवहार गरेबापत १५६ मिलियन डलरभन्दा बढी रकम घुस स्वीकार गरेको अभियोगमा दोषी ठहर गरिएको थियो।

सिएचएच चाइना हुआरोङ एसेट म्यानेजमेन्टको सहायक कम्पनी हो, जसले देशको सबैभन्दा ठूलो सम्पत्ति व्यवस्थापन कोषको रूपमा खराब ऋण व्यवस्थापनका बारेमा चासो राख्छ।

राष्ट्रपति सी जिनपिङको वर्षौँ लामो भ्रष्टाचार विरोधी दमनको एक प्रमुख लक्ष्य ह्वारोङ रहेको छ। यसका पूर्व अध्यक्ष सियाओमिनलाई सन् २०२१ जनवरीमा २५ करोड ३० लाख डलरको घुस लिएको आरोपमा मृत्युदण्ड दिइएको थियो। अन्य धेरै हुआरोङ अधिकारीहरू पनि भ्रष्टाचार विरोधी अनुसन्धानमा फसेका छन्।

उत्तरी शहर तियानजिनको अदालतले सन् २०२४ मेमा बाईलाई पहिलो पटक मृत्युदण्डको सजाय सुनाएको थियो, जुन निलम्बन गरिएको थिएन। चीनमा भ्रष्टाचारका लागि मृत्युदण्डको सजाय प्रायः दुई वर्षको छुटका साथ जारी गरिन्छ र पछि आजीवन कारावासमा परिवर्तन गरिन्छ।

बाईले आफ्नो सजायविरुद्ध अपील गरेकी थिइन् तर मूल फैसलालाई फेब्रुअरीमा सदर गरिएको थियो। चीनको सर्वोच्च अदालत (सुप्रिम पिपुल्स कोर्ट- एसपिसी) ले समीक्षापछि निर्णयको पुष्टि गर्दै बाईको अपराध 'अत्यन्त गम्भीर' भएको बताएको छ।

सीसीटीभीले एसपिसीलाई उद्धृत गर्दै लेखेको छ, "बाईले असाधारण रूपमा ठूलो रकम घुस स्वीकार गरेकाले उनको अपराधको अवस्था असाधारण थियो। यसको सामाजिक प्रभाव विशेष थियो र राज्य र जनताको हितले असाधारण रूपमा ठूलो क्षति बेहोरेको थियो।"

मङ्गलबार बिहान तियानजिनमा नजिकका आफन्तहरूसँग भेटेपछि बाईलाई मृत्युदण्ड दिइएको थियो, तर उनलाई कसरी मृत्युदण्ड दिइयो भन्ने खुलाइएको छैन।

बाई चीनको वित्त उद्योगमा भ्रष्टाचारविरुद्ध लामो समयदेखि चलिरहेको कारबाहीमा सजाय भोग्ने पछिल्लो उच्च पदका व्यक्ति हुन्।

भ्रष्टाचार विरोधी अभियानका समर्थकहरूले यसले स्वच्छ शासनलाई बढावा दिएको बताएका छन्, तर आलोचकहरूले यसले सीलाई राजनीतिक प्रतिद्वन्द्वीहरूलाई सफाया गर्ने शक्ति प्रदान गरेको रूपमा मात्र हेर्छन्।